“ألو أمن الدولة” تويتات مصرية جديدة

Posted on 22 يوليو 2011 بواسطة



مصر – برق

 

عقب تصريحات د. حازم عبدالعظيم المستبعد من الترشيح لوزارة الاتصالات ومدير تكنولوجيا المعلومات بالوزارة بأن جهاز أمن الدولة لا يزال يتنصت على هواتف المصريين أنشا رواد موقع التدوينات القصيرة تويتر “هاشتاج” أو صفحة تحت عنوان “ألو أمن الدولة” اخترنا لكم منها بعض التعليقات الساخرة التي تصلح للنشر :

* ألو .. أمن الدولة . لا ده الأمن الوطني . يا سيدي أهو كله برتقال
* واحد اتصل بأمن الدولة قال له عندك تعذيب ؟ قال له لأ , وهو عنده جوه
* ألو .. أمن الدولة ؟ ممكن اعرف الجمل اللي كان في معركة الجمل كان جمل ولا جملاية ؟
* ألو .. أمن الدولة ؟ كان عندي سؤال : هو اللي بيطلع إعارة عندكم بيروح جوانتانامو ؟
* أمن الدولة صارخا : يا نهار اسود … تصدقوا سلخت قبل ما ادبح
* ألو .. أمن الدولة ؟ ممكن اعمل أوردر ؟
* يا ام نياظي .. صحي نياظي وقولي له أمن الدولة ع التليفون
* ألو .. أمن الدولة ؟ ممكن اكلم خالد صلاح ؟
* ألو .. أمن الدولة ؟ انتو مبتجوش ليه ؟ مش تبقوا تيجوا ؟ احنا بنبقى هناك
* ألو .. أمن الدولة ؟ اللي يتصنت لوحده يزور .. لو فيه مكالمة حلوة ابقى افتكرنا
* ألو .. أمن الدولة ؟ الهاتف الذي طلبته قد يكون محروقا أو منفوخا .. حاول في وقت لاحق
* ابقى سلم لي على جوزو يا اسماعيل بيه
* طب اقفل انت الأول .. طب نعد مع بعض 1، 2، 3 ونقفل مع بعض
* ألو .. أمن الدولة ؟ ممكن تشوفلي اخر نمرة رنت عليا بالليل اصل نسيت اسيفها
* لوعايز فتنة طائفية إضغط الرقم واحد.لو عايز إغتصاب إضغط الرقم اتنين..لو عايز نفخ أو إعتقال..اضغط الرقم تلاتة
* ألو .. امن الدولة ؟ كنت ناوي اشتري موبايل جديد لو ممكن اعرف ايه اكتر نوع صوته بيبقى واضح عندكو
* آلو، أمن الدولة؟ اديني خدمة العملاء من فضلك .. لا عملاء أمريكا مش اسرائيل
* ألو,أمن الدولة,,هاتولي نمرة رئيس الجامعة,,أيوا,,إللي إنتوا معينينه
* ألو .. أمن الدولة ؟ لو سمحتو ابعتولي اخر مكالمة مع مراتي مليتني لستة بقالة وانا نسيت معظمها
* مراقبة امن الدولة للمكالمات بتحسس الواحد بالالفة وانه مش ف المكالمة لوحده الواحد يحس برضه بالونس
* الو …..امن الدولة …. انا عايز سبعة خرطوش مطاطى لو فى- و خمسة مسيل للدموع و اتنين مشكل .. العنوان .. التحرير
* ألو .. أمن الدولة ؟ كنت عايز الملف بتاعي علشان رايح اقدم في الكلية بكرة
* ألو .. أمن الدولة ؟ انتو لسه أسئلتكم سين وجيم ولا هاتطورها لاختيار من متعدد ؟
* كل المصريين يعلمون من هو أمن الدولة . ويحز في نفسي ما ألقاه من بعض بني تويتر . وإنني لم أكن أنتوي التنصت لفترة رئاسية جديدة
* ألو .. امن الدولة ؟ ممكن نعرف مين هو أحد القيادات اللي بيتصل بيسري فودة على طول ؟
* ألو .. امن الدولة ؟ هو الزمالك هياخد الدوري إمتى ؟
* اضف الى مكتبتك | سلسله تسجيلات ونوادر امن الدوله .. احصل على نسختتك مصحوبه بسى دى شرح بالصور .. مكتبه جزيره الورد
* أمن الدولة : احنا فعلاً شغالين أوفر تيم من دلوقتي…بندرب البلطجية علشان الانتخابات قربت
* انا ممكن اسامحكو على اي حااجة بس مش هقدر اسامحكو ان انتو رجعتو هالة سرحان
* ألو .. أمن الدولة ؟ ممكن واحد فلول واتنين ذيول نظام مشوي من فضلك
* أمن الدولة : المكالمات اللي حضرتك اتكلمتها دي اتسجلت .. لو حابب نذيع قول ذيع
* نصيحة من أمن الدولة : ريم بنت مش كويسة .. صاحبك علاء مخلص ومية مية
* ألو .. امن الدولة ؟ الكهربا قاطعة عندنا .. ابعتولنا شوية
* ألو .. امن الدولة ؟ كاوتش العربية باظ وكنت عاوز اغيره . إيه ؟ .. لأ . لأ .. نفخ لأ
* ليه تتعذب في الغربة بره .. وانت عندك أمن الدولة جوه !
* مع أمن الدولة .. انت دائما في قلب الحدث
* أمن الدولة .. شبكة واحدة .. بتعذبنا كلنا
* ألو .. أمن الدولة ؟ انتو شغالين الجمعة ولا بتقفلوا ؟
* أمن الدولة .. رمضانك عندنا أحلى
* ألو .. أمن الدولة ؟ قوم صلي الفجر ربنا يهديك وبطل افترا على الناس
* ألو ألو .. أمن الدولة .. ما تمشيش .. هاصلي الفجر واجيلك
* أنا كأمن الدولة .. انبسطت